Լավրովը կայցելի Հայաստան

Ռուսաստանի Դաշնության արտգործնախարար Սերգեյ Լավրովը նոյեմբերի 10-11-ը կայցելի Հայաստան. հայտնում է «Կոմերսանտ» թերթը՝ իր աղբյուրների հղումով:

Այցի շրջանակում հուշագիր կստորագրվի, որը կերաշխավորի ռուս մասնագետների այցը Հայաստանում գտնվող կենսաբանական լաբորատորիա, որը ստեղծվել է ԱՄՆ ռազմական գերատեսչության՝ Պենտագոնի կողմից հատկացված միջոցներով:

Ռուսաստանը բազմիցս քննադատել է ԱՄՆ-ին՝ ռուսական սահմանների մոտ «ռազմա-բժշկա-կենսաբանական ակտիվության» համար և խոստացել հասնել նրան, որ հարևան երկրներում գործող լաբորատորիաների գործունեությունը թափանցիկ լինի իր համար:   

Լրատվամիջոցի աղբյուրներից մեկը հավաստիացրել է, որ փաստաթղթի տեքստը պատրաստ է, և այս պահին միջգերատեսչական համաձայնեցում է անցնում: Նա պարզաբանել է, որ հուշագիրը ենթադրում է երկու երկրների համագործակցություն բժշկա-կենսաբանական ոլորտում: Այն մարդկանց թվում, որոնք կարող են այցելել Հայաստանում գործող կենսաբանական լաբորատորիա, ՌԴ առողջապահության ու պաշտպանության նախարարությունների մասնագետներն են:

ԱՄՆ-ի միջոցներով արդիականացված նորագույն լաբորատորիաները, որոնցում իրականացվում են կենսաբանական հետազոտություններ, ուսումնասիրվում են վիրուսներ ու շտամներ, գործում են Ուկրաինայում, Վրաստանում, Հայաստանում և Ղազախստանում: Մոսկվայի մտահոգությունն է առավելապես առաջացնում Թբիլիսիի մերձակայքում գտնվող՝ Ռիչարդ Լուգարի անվան հետազոտական կենտրոնը: