Պայթյուն` Թուրքիայի սահմանին. տագնապ է հայտարարվել

Թուրքիայի Քիլիս քաղաքի դիմաց գտնվող սիրիական Ազազ շրջանում հզոր պայթյուն է որոտացել. տեղեկացնում է Ermenihaber-ը:

Ըստ թուրքական «Haberler.com» լրատվական կայքի` Ազազի կենտրոնում ռումբերով բեռնավորված մեքենա է պայթեցվել: Հզոր պայթյունի հետևանքով զոհվել է 5, վիրավորվել` 10 մարդ:

Նշվում է, որ Թուրքիայի կողմից հովանավորվող «Սիրիական ազատ բանակ» անվանումով զինված ընդդիմադիր խմբավորման հսկողության տակ գտնվող շրջանում տեղի ունեցած պայթյունը կազմակերպել են «Իսլամական պետություն» (ԻՊ) ահաբեկչական կազմակերպության զինյալները:

Պայթյունից հետո Թուրքիայի սահմանի նշյալ հատվածում տագնապ է հայտարարվել:

Ահաբեկչության հետևանքով վիրավորվածների մի մասը տեղափոխվել է Թուրքիայի Քիլիս քաղաքի պետական հիվանդանոց: