Օսմանյան արխիվի հայկական փաստաթղթերը վաճառվել են Բուլղարիային. թուրք պատմաբան

Թուրք պատմաբան Ռաշիդ Գյունդողդունը իր նոր հոդվածում պնդում է, թե 1931 թվականին Օսմանյան արխիվի` Հայկական հարցին և Բուլղարիայի պատմությանը վերաբերող փաստաթղթերը վաճառվել են Բուլղարիային. տեղեկացնում է Horizonweekly-ն:

Թուրքական «Թայմ թուրք» կայքի հաղորդմամբ՝ փաստաթղթերի վաճառքի գործում մեծ դեր է ունեցել Գալաթասարայի համալսարանի շրջանավարտ Պանչո Դորեֆը, ով օսմանյան արխիվներում ուսումնասիրել է Բուլղարիայի պատմությունն ու Հայկական հարցը:

Ըստ հոդվածագրի` Դորեֆը կապ է հաստատել Բուլղարիայի կառավարության հետ և իր գործընկերների հետ կազմակերպել փաստաթղթերի տեղափոխումը Բուլղարիա:

Ավելի վաղ ֆրանսիական «Le Nouvel Observateur» շաբաթաթերթը հայտնել էր, որ Վատիկանը հայերի մասին փաստաթղթերի մեծ մասը Բուլղարիայից գնել է 1931 թվականին, որի համար, ըստ թուրքական «Turkiye Gazetesi»-ի, Վատիկանը վճարել է 40 միլիոն բուլղարական լև: