Ադրբեջանը Բուլղարիային բողոքի նոտա է հղել բուլղարացի պատգամավորների ղարաբաղյան այցի կապակցությամբ

Սոֆիայում Ադրբեջանի դեսպանատունը Բուլղարիայի արտգործնախարարությանը բողոքի նոտա է հղել բուլղարացի պատգամավորներ Վալերի Սիմեոնովի և Իորդան Ապոստոլովի՝ օգոստոսի 6-7-ը Լեռնային Ղարաբաղ կատարած այցի կապակցությամբ: Այս մասին հայտնում է Trend ադրբեջանական գործակալությունը:

Ըստ Ադրբեջանի ԱԳՆ-ի,  Սիմեոնովը, որը հայտնի է իր հայամետ դիրքորոշմամբ, արդեն երրորդ անգամ է այցելում Լեռնային Ղարաբաղ և ներառված է ադրբեջանական «սև ցուցակում». նրան արգելված է մուտք գործել Ադրբեջան:

Ադրբեջանի արտգործնախարարությունը հայտարարել է, որ Ապոստոլովի համար նույնպես Լեռնային Ղարաբաղ այցը նման հետևանքների կարող է հանգեցնել:

Օգոստոսի 7-ին բուլղարացի պատգամավորները Ստեփանակերտում հանդիպել են Լեռնային Ղարաբաղի Ազգային ժողովի խոսնակ Աշոտ Ղուլյանի հետ, խոսել  Համահայկական 7-րդ ամառային խաղերի բացման արարողության մասին և պատրաստակամություն են հայտնել «աջակցել եղբայրական հայ ազգին իրենց բոլոր նախաձեռնություններում: