ԱՄՆ-ի ներկայացուցիչը կոչով դիմել է Հայաստանին ու Ադրբեջանին

ԱՄՆ պետքարտուղարի օգնականի տեղակալ Բրենթ Հարթլին, ելույթ ունենալով Վիեննայում անցկացվող` ԵԱՀԿ անվտանգության հարցերով ամենամյա կոնֆերանսի ժամանակ, կոչ է արել Հայաստանին և Ադրբեջանին` ակտիվացնել ԼՂ հակամարտության կարգավորմանն ուղղված ջանքերը. հայտնում է ադրբեջանական Turan-ը:

«Հուսով ենք, որ Հայաստանի ու Ադրբեջանի նախագահները կընդունեն Ֆրանսիայի նախագահ  Ֆրանսուա Օլանդի` մոտ ապագայում Փարիզում հանդիպելու առաջարկը: Շվեյցարիայի նախագահ Դիդիե Բուրկհալթերի`  բանակցություններն ավելի առարկայական դարձնելու  կոչը ևս հնարավորություն է տալիս կողմերին խաղաղության գործընթաց գրանցել»,- ասել է նա:

Հարթլին ընդգծել է, որ ժողովրդական դիվանագիտության ուղղությամբ ջանքերը նույնպես կարող են օգնել հակամարտության կարգավորմանը:

Ամերիկացի քաղաքական գործիչը նաև հավելել է, որ, որպես Մինսկի խմբի համանախագահ, ԱՄՆ-ը «շարունակում է հավատարիմ մնալ այս հակամարտության խաղաղ կարգավորման գործընթացին»: