Անի Գևորգյանին դատաբժշկի ուղեգիր կտան

«Չորրորդ ինքնիշխանություն» թերթի թղթակից Անի Գևորգյանին այսօր հրավիրել են ՀՀ ոստիկանության ներքին անվտանգության վարչություն, ինչպես նաև ՀՔԾ` փետրվարի 12-ին տեղի ունեցած միջադեպի վերաբերյալ նշանակված ծառայողական քննության շրջանակներում պարզաբանումներ տալու: Այս մասին yerkir.am-ի հետ զրույցում ասաց լրագրողը:

Նա նաև տեղեկացրեց, որ երեկ իրեն է զանգահարել ՀՔԾ-ի քննիչը և հայտնել, որ գործի շրջանակներում դատաբժշկական փորձաքննություն է նշանակվել, և որ իրեն պետք է դատաբժշկի ուղեգիր տրամադրեն:

Նշենք, որ ՀՔԾ-ն քննությունն սկսել է ՄԻՊ գրասենյակի դիմումի հիման վրա:

Փետրվարի 12-ին` մարտի 1-ի հանրահավաքի մասին իրազեկման ժամանակ, ոստիկանները,  բռնություն կիրառելով,  բերման են ենթարկել լրագրողին և տարել ոստիկանության Կենտրոնականի բաժին, որտեղ մի տղամարդ հարվածել է նրան: Ըստ որոշ տեղեկությունների` այդ տղամարդը ոստիկանության Կենտրոնի բաժնի պետ Արտակ Պողոսյանն է: