Այսօր SOS-ի ծննդյան օրն է

1906 թվականի հենց այս օրը աշխարհի 29 երկրների ներկայացուցիչներ Բեռլինում կայացած Ծովային կոնֆերանսի ժամանակհաստատեցին ծովային աղետի նոր՝  SOS ազդանշանը:

Քանի դեռ չէր հայտնաբերվել ռադիոն, նավարկությունների ժամանակ օգտագործում էին աղետի մասին տեղեկություն հաղորդելու տարբեր տեսողական և լսողական ազդանշաններ: Մինչ SOS-ի ի հայտ գալը նավաստիներն օգտագործում էին CQD տառերը. առաջին երկու տառը բոլոր ռադիոկայանների ստանդարտ կանչն է, իսկ D-ն անգլերեն Danger՝ վտանգ բառի սկզբնատառը:  Մորզեի այբուբենի պարագայում այդ արտահայտությունը համարվեց բավական բարդ կոդ, եւ թյուրիմացություններից խուսափելու համար որոշվեց ընտրել SOS տարբերակը:

Սակայն 1999-ին որոշում կայացվեց, որ բոլոր նավերը, որպես աղետի ազդանշան, պետք է օգտագործեն ավելի կատարելագործված GMDSS համակարգը: Չնայած դրան` SOS-ը նախկինի նման շարունակում է մնալ կիրառելի: