Ավագների օրինակով հաղթեց բիոմասսան

Այսօր ԱԺ դահլիճում նիստ էր գումարել Երիտասարդական խորհրդարանը: Սակայն երբ օրվա վերջում պետք է կազմակերպվեին քվեակությունները, պարզվեց, որ իշխանական երիտասարդներն այնքան էլ չեն տարբերվում իրենց ավագ գործընկերներից:

«Կամավոր աշխատանքի մասին օրենքում փոփոխություններ եւ լրացումներ կատարելու մասին» օրինագիծը քիչ էր մնում տապալվեր քվորումի բացակայության պատճառով:

Օրինագծին դեմ արտահայտված ԵԽ ՀՅԴ խորհրդարանական խմբակցության  ներկայացուցիչները նշեցին,  որ այնտեղ բազմաթիվ թերություններ կան, եւ օրինագիծը վերամշակման կարիք ունի: Օրինագիծը ներկայացնողներն էլ, չնայած ընդունեցին թերությունները, բայց հայտարարեցին, թե «այս անգամ պիտի անցնի»:

Իսկ երբ 66 պատգամավորի փոխարեն քվեարկեց 64 պատգամավոր եւ օրինագիծը չընդունվեց, ԵԽ նիստը նախագահող հանրապետական Հարություն Ազգալդյանը քվեարկություն կազմակերպեց երկրորդ անգամ՝ մինչեւ քվորումի ապահովումը: Փաստորեն, Երիտասարդական խորհրդարանում էլ է բիոմասսան հաղթանակում: