Լիբանանը երկու հայ նախարար է ունենալու

Լիբանանի վարչապետի պարտականությունները կատարող Նաջիբ Միկատի եւ գեներալ Միշել Այունի ղեկավարած Ազատ հայրենասիրական շարժման ներկայացուցիչների` նոր կառավարություն կազմելու վերաբերյալ արդեն 5 ամիս ձգվող բանակցություններում առաջընթաց է գրացվել:

Ըստ լիբանանյան ԶԼՄ-ների`  Ազատ հայրենասիրական շարժումը հաղորդագրություն է տարածել, որում նշել է, որ «նոր կառավարության ձեւավորման ճանապարհին գոյություն ունեցող բոլոր էական բարդությունները հարթվել են»:

Ինչպես «Երկիր»-ին տեղեկացրեց Բեյրութում լույս տեսնող «Ազդակ» օրաթերթի գլխավոր խմբագիր Շահան Գանտահարյանը, 30 հոգանոց կառավարությունում տեղ է հատկացված նաեւ հայ համայնքի երկու ներկայացուցիչների, սակայն կառավարության ձեւավորման պաշտոնական ընթացակարգը դեռ չի սկսվել:

Ի դեպ, mignews.com կայքին Ազատ հայրենասիրական շարժմումից հայտնել են, որ հայ համայնքին հավանորեն բաժին կհասնեն արդյունաբերության նախարարի եւ պետական նախարարի պորտֆելները: Կոնկրետ անուններ չեն նշվել: