ԵՐԿԻՐ. Փող չունե՞նք, թե՞ շնորհք

Հայաստան-Ռուսաստան ֆուտբոլային խաղի հեռուստատեսային հեռարձակման ընթացքում, ի տարբերություն նախորդների, զարմանալիորեն ընդամենը 2 անգամ ցուցադրվեց կառավարական օթյակը, մինչդեռ պարբերաբար հեռուստաէկրաններին էր այն միակ երկրպագուն, որը խաղին ժամանել էր Վրաստանի դրոշով:

Տարակուսանքը փարատվեց հետեւյալ տեղեկատվությամբ: Բանն այն է, որ Հայաստանի հավաքականի խաղերի ցուցադրման իրավունքները գնել է գերմանական Sport faive ընկերությունը, որն էլ որոշել է չվստահել հայ մասնագետներին, իսկ ուղիղ հեռարձակման կազմակերպման համար հրավիրվել էր վրացական խումբ, որը ժամանել էր սեփական տեխնիկայով:

Ովքեր խաղին հետեւել են հեռուստատեսությամբ, կհամաձայնեն, որ ցուցադրությունը բացառիկներից չէր: Կասկածից դուրս է, որ հայ մասնագետները շատ ավելի լավ հեռարձակումներ են իրականացրել:

Պարզապես այստեղ եւս մեր մասնագետների բախտը չբերեց, որովհետեւ հայկական հեռուստաընկերությունները, զբաղված լինելով ռեյտինգային մրցավազքով, «մոռացել» են տեխնիկական վերազինման մասին եւ իրենց ամբողջ ունեցած-չունեցածը ներդրել են ու շարունակում են ներդնել սերիալների ֆինանսավորման մեջ: