Իրանը միշտ նախապատվությունը տվել է դիվանագիտությանը, ոչ թե պատերազմին. Փեզեշքիան

Իրանը միշտ նախապատվությունը տվել է վեճերի կարգավորմանը դիվանագիտական, այլ ոչ թե ռազմական ճանապարհով, հայտարարել է երկրի նախագահ Մասուդ Փեզեշքիանը՝ ընդգծելով, որ հակամարտությունը չի ծառայի ո՛չ Իրանի, ո՛չ ԱՄՆ-ի, ո՛չ էլ տարածաշրջանի շահերին, հաղորդում է Tasnim-ը։

Շաբաթ երեկոյան Եգիպտոսի նախագահ Աբդել Ֆաթահ աս-Սիսիի հետ հեռախոսազրույցում Փեզեշքիանը շեշտել է Իրանի հաստատակամ նվիրվածությունը դիվանագիտական գործընթացների ձևավորմանը և արժանապատիվ դիվանագիտության իրականացմանը, որը հիմնված է հավասարության վրա և զերծ է սպառնալիքներից։

Ըստ նրա, Թեհրանը հույս ունի, որ մյուս կողմը կհասկանա, որ ճնշումն ու հարկադրանքը չեն կարող ստիպել Իրանին բանակցությունների։ Նախագահը շնորհակալություն է հայտնել իսլամական երկրների անկեղծ, պատասխանատու և եղբայրական ջանքերին՝ նպաստելու տարածաշրջանային լարվածության թուլացմանը և Իրանի աջակցությանը։

Նա նաև վերահաստատել է Իրանի սկզբունքային արտաքին քաղաքականությունը, որն ուղղված է ներքին համախմբվածության ամրապնդմանը և հարևան իսլամական երկրների հետ բարեկամական հարաբերությունների խորացման հետևողական աշխատանքին։

Խոսելով ԱՄՆ-ի և Իսրայելի գործողությունների մասին, որոնք ուղղված են «լարվածության սրմանը, պատերազմների պարտադրմանը, ճնշումների և պատժամիջոցների պահպանմանը», ինչպես նաև Իրանի ներսում անկարգությունների հրահրմանը, Փեզեշքիանը ընդգծել է, որ Թեհրանը երբեք չի ձգտել պատերազմի և հիմա էլ չի ձգտում։

Շեշտելով, որ Իրանի տարածքի վրա ցանկացած ագրեսիայի կամ հարձակման դեպքում կտրվի վճռական և հզոր պատասխան, նա կրկնել է, որ Իրանը շարունակում է առաջնահերթություն տալ հարցերի խաղաղ կարգավորմանը՝ դիվանագիտության միջոցով, որը իրականացվում է հանգիստ և կառուցողական մթնոլորտում։

Իր հերթին Եգիպտոսի նախագահը ողջունել է կայացած զրույցը և խաղաղության, կայունության և անվտանգության հույս հայտնել՝ ինչպես իրանական ազգի, այնպես էլ տարածաշրջանի ժողովուրդների համար։

Աս-Սիսին հայտարարել է, որ տարածաշրջանային ճգնաժամերը չունեն ռազմական լուծում և նախազգուշացրել է, որ ցանկացած սրում կունենա բացասական հետևանքներ ողջ տարածաշրջանի համար։

Նա հավելել է, որ Եգիպտոսը կշարունակի ջանքերը լարվածության նվազեցման ուղղությամբ և պատրաստ է աջակցել դիվանագիտական նախաձեռնություններին, որոնք նպատակ ունեն ամրապնդել տարածաշրջանային կայունությունը։