Թրամփը շնորհակալություն է հայտնել Փաշինյանին և Ալիևին․ նա կարծում է, որ վերջ է դրել պատերազմին

ԱՄՆ նախագահ Դոնալդ Թրամփը շնորհակալություն է հայտնել Նիկոլ Փաշինյանին և Իլհամ Ալիևին՝ անցյալ տարվա օգոստոսին ձեռք բերված համաձայնությունը պահպանելու համար: Թրամփն այս մասին գրառում է կատարել Truth սոցիալական ցանցի իր էջում:

«Ուզում եմ շնորհակալություն հայտնել Ադրբեջանի նախագահ Ալիևին և Հայաստանի վարչապետ Փաշինյանին՝ անցյալ տարվա օգոստոսին մեր կողմից ստորագրված խաղաղության համաձայնագիրը պահպանելու համար։ Սա սարսափելի պատերազմ էր՝ 8 պատերազմներից մեկը, որոնց ես վերջ եմ դրել: Հիմա տիրում է բարգավաճում և խաղաղություն»,-գրել է ԱՄՆ նախագահը:

Թրամփը հայտնել է, որ փետրվարին ԱՄՆ փոխնախագահ Վենսը կայցելի երկու երկրներ՝ խաղաղությանն ուղղված ջանքերը զարգացնելու և TRIPP նախագիծն առաջ մղելու համար։

ԱՄՆ նախագահը նշել է, որ կամրապնդեն իրենց ռազմավարական գործընկերությունը Ադրբեջանի հետ, Հայաստանի հետ կկնքեն խաղաղ միջուկային համագործակցության վերաբերյալ համաձայնագիր: Կկնքեն նաև գործարքներ՝ կիսահաղորդիչների՝ ամերիկյան մեծ արտադրողների համար և Ադրբեջանին կվաճառեն ԱՄՆ-ում արտադրված պաշտպանական սարքավորումներ, ինչպիսիք են զրահաբաճկոններ, մոտորանավակներ և այլն: