«Քրեակատարողական բժշկության կենտրոն» ՊՈԱԿ-ից հավաստիացրին, որ այսօր անպայման կլուծեն Նարեկի տեղափոխման հարցը․ Գառնիկ Դանիելյան

ՀՅԴ Տավուշի Մարզային կոմիտեի ներկայացուցիչ, ՀՀ ԱԺ «Հայաստան» խմբակցության պատգամավոր Գառնիկ Դանիելյանն անդրադարձել է Նարեկ Սամսոնյանի հարցին՝ նշելով, որ նա պետք է ժամ առաջ տեղափոխվի բժշկական հաստատություն։

«Այսօր մասնակցեցի քաղբանտարկյալների թեմայով հրավիրված քննարկմանը, որտեղ ևս մեկ անգամ անդրադարձա ստեղծված իրավիճակի անթույլատրելիությանը։

Ուզում եմ ընդգծել, որ քաղբանտարկյալների թեման իմ և գործընկերներիս համար օրակարգային է։ Գրեթե ամենօրյա ռեժիմով մենք այցելում ենք քրեակատարողական հիմնարկներ, բարձրաձայնում ենք խնդիրը թե՛ ելույթների, թե՛ պատկան մարմիններին և մեր միջազգային գործընկերներին ուղղված գրությունների միջոցով։

Կարևոր է նաև մեր աջակցությունը քաղաքական հայացքների համար հետապնդվող անձանց ընտանիքներին։ Նրանք որևէ պահի իրենց չպետք է միայնակ զգան։

Այս պահին հրատապ է հատկապես Նարեկ Սամսոնյանի հարցը, որն արդեն 15 օր է, ինչ դիմել է պայքարի ծայրահեղ միջոցի՝ հացադուլի։ Նարեկը պետք է ժամ առաջ տեղափոխվի բժշկական հաստատություն, որտեղ էլ կիրականացվեն անհրաժեշտ հետազոտություններն ու վիրահատությունը։

Հ․ Գ․ Քիչ առաջ ևս մեկ անգամ կապ հաստատեցի

«Քրեակատարողական բժշկության կենտրոն» ՊՈԱԿ-ի հետ, որտեղից հավաստիացրին, որ այսօր անպայման կլուծեն Նարեկի տեղափոխման հարցը»։