Կառավարությունը Ժաննա Անդրեասյա՞նն է, թե՞ Նիկոլ Փաշինյանը

Չնայած, որ Նիկոլ Փաշինյանն ասում է` կառավարությունն ինքն է, փաստերը ցույց են տալիս այլ բան, այն, որ  կառավարությունը տվյալ դեպքում Ժաննա Անդրեասյանն է:

«Կրթության մասին» ՀՀ օրենքի 36-րդ հոդվածը սահմանում է, որ կառավարությունն է  հաստատում ուսուցանվող մասնագիտությունների ցանկը:
Նույն օրենքի 15-րդ հոդվածում ասվում է.  «Բարձրագույն ուսումնական հաստատությունների տվյալ տարվա ՄԱՍՆԱԳԻՏՈՒԹՅՈՒՆՆԵՐԻ և ընդունելության քննությունների ցանկը կրթության պետական կառավարման լիազորված մարմնի ներկայացմամբ հաստատում և մինչև տվյալ տարվա դեկտեմբերի 1-ը պաշտոնապես հրապարակում է Հայաստանի Հանրապետության կառավարությունը: Հաստատված ցանկում փոփոխություններ և լրացումներ կատարելն ԱՐԳԵԼՎՈՒՄ Է, բացառությամբ այն դեպքերի, երբ փոփոխությունների և լրացումների կատարման, ինչպես նաև նոր ցանկի հաստատման անհրաժեշտությունը պայմանավորված է հայտարարված արտակարգ կամ ռազմական դրությամբ»:

Սակայն, պարզվում է, որ ԿԳՄՍ նախարար Ժաննա Անդրեասյանի 2025 թ. հուլիսի 28-ի թիվ 27-Լ հրամանով Հայաստանի ազգային ագրարային համալսարանին թույլատրվել է իրականացնել ընդունելություն «Ագրոմեխատրոնիկա և ճշգրիտ ռոբոտատեխնիկա» մասնագիտությամբ: Եվ սա Անդրեասյանն արել է առանց տվյալ մասնագիտության կառավարության կողմից հաստատման:

Փաստորեն, ստացվում է, որ տիկին Ժաննան իրեն է վերագրել կառավարության լիազորությունները, և կառավարությունն ինքն է, և ոչ թե Նիկոլ Փաշինյանը:

Վ. Ս.