Եմենի վարչապետը հրաժարական է տվել

Եմենի վարչապետ Ահմեդ Ավադ բեն Մուբարաքը սոցիալական ցանցում հայտարարել է իր պաշտոնից հրաժարվելու մասին։

Բեն Մուբարաքը Եմենի վարչապետ է նշանակվել 2024 թվականի փետրվարի սկզբին։ Նախկինում նա զբաղեցրել է արտաքին գործերի նախարարի պաշտոնը։

«Ես ավարտեցի նախագահական խորհրդի ղեկավար Ռաշադ ալ-Ալիմիի հետ իմ հանդիպումը և նրան հանձնեցի վարչապետի պաշտոնից իմ հրաժարականը», - իր էջում գրել է Մուբարաքը։

Նա հրաժարական տալու իր որոշումը բացատրել է «իր սահմանադրական լիազորությունները կատարելու և կառավարությունում վերադասավորումներ իրականացնելու անկարողությամբ»։ Բեն Մուբարաքը շեշտեց, որ իր աշխատանքում բազմաթիվ դժվարությունների է հանդիպել։