Հունաստանի վարչապետը հրաժարական է տվել

Հունաստանի վարչապետ Յորղոս Պապանդրեուն հրաժարական է տվել: Այդ որոշումը կայացվել է երեկ երեկոյան երկրի նախագահի, վարչապետի եւ առաջատար ընդդիմադիր կուսակցության առաջնորդի հետ եռակողմ հանդիպման ժամանակ. տեղեկացնում է mignews.com-ը:

Հունաստանի քաղաքական առաջնորդները հայտարարել են, որ մոտ 1 ժամ տեւած եռակողմ հանդիպման ժամանակ որոշվել է ստեղծել նոր կոալիցիոն կառավարություն, քանի որ Եվրամիությունը ճնշում է գործադրում`ձգձգելով ֆինանսական օգնության տրամադրումը:

Այսօր Հունաստանի երկու խոշոր կուսակցությունների առաջնորդները հանդիպելու են` որոշելու նոր կառավարության կազմը:

Հոկտեմբերի 26-ին ԵՄ անդամ երկրների ղեկավարները համաձայնության եկան Հունաստանի պարտքը չեղյալ համարելու հարցում, սակայն պայմանով, որ երկիրը կանցնի խիստ տնտեսման քաղաքականության: ԵՄ-ն եւ Արժույթի միջազգային հիմնադրամը անցյալ շաբաթ դադարեցրել էին օգնության տրամադրումը` վկայակոչելով երկրի քաղաքական անորոշությունը (որոշվել էր այդ հարցով հանրաքվե անցկացնել), եւ Հունաստանը հայտնվել էր դեֆոլտի վտանգի առջեւ: