Ինչո՞ւ ՔՊ-ն պաշտպանեց պետական դավաճաններին

Մարտի 22-ին ԱԺ-ում պատգամավորներ Իշխան Սաղաթելյանի, Արամ Վարդևանյանի ու Աղվան Վարդանյանի ներկայացրած՝ «Քրեական օրենսգրքում լրացում կատարելու» մասին ու «Քրեական դատավարության օրենսգրքում լրացում կատարելու» մասին օրենքների նախագծերի փաթեթն էր քննարկվում, որով քրեական պատիժ է նախատեսվում բոլոր նրանց նկատմամբ, ովքեր հարցականի տակ կդնեն ՀՀ ինքնիշխանությունն ու  տարածքային ամբողջականությունը: Ըստ էության, այն ազգային, պետական անվտանգության ամրապնդմանն ուղղված նախաձեռնություն է, բայց իշխանությունը, ի դեմս ՔՊ խմբակցության, դեմ է այս օրենքին:

Այսօր էլ Ազգային ժողովը քվեարկությամբ չընդունեց  նշված օրինագծերի փաթեթը: ԱԺ «Քաղաքացիական պայմանագիր» խմբակցության ղեկավար Հայկ Կոնջորյանը հայտարարեց, որ իրենք դեմ են քվեարկելու նախագծին:

Բնականաբար, ՔՊ-ն ներկայացնողներն ԱԺ-ում չտվեցին և չէին էլ կարող որևէ հոդաբաշխ կամ տրամաբանական բացատրություն, հիմնավորում կամ պատճառ ներկայացնել, որով իրենք դեմ հանդես եկան նշված կարևոր և ոչ քաղաքական բնույթի նախագծին:

Հետևաբար, ՔՊ-ի նման վարքագիծը ողջամիտ կասկածներ է առաջացնում ցանկացած բանական մարդու մոտ, որ իշխանությունը խաբեությամբ զավթած խունտան, որն ուղղակի և անուղղակի կերպով սպասարկում է թուրք-ադրբեջանական շահերը, նախապատրաստվում է Հայաստանի Հանրապետության նորանոր տարածքներ զիջել թշնամուն, միաժամանակ՝ կատարել քայլեր, որոնք սպառնալիք են ՀՀ ինքնիշխանության համար:

Ելնելով վերոնշյալից՝ ՔՊ-ի ներկայացուցիչներն այդ քայլով որոշել են դեռ այս գլխից ապահովագրել իրենց, որպեսզի վաղը, երբ հանդես գան ՀՀ ինքնիշխանության և տարածքային ամբողջականության դեմ նորանոր գործողություններով, չենթարկվեն քրեական պատասխանատվության:

Վ. Սարգսյան