Իսպանիան որոշել է հարձակողական զենք չմատակարարել Թուրքիային

Հունաստանի և Իսպանիայի ԱԳ նախարարների հանդիպման ժամանակ Հունաստանի արտգործնախարար Նիկոս Դենդիասը մտահոգություն է հայտնել Թուրքիայի հետ ռազմական համագործակցությունն ակտիվացնելու՝ Իսպանիայի մտադրության կապակցությամբ։ Միաժամանակ, Իսպանիան Հունաստանին հավաստիացրել է, որ հարձակողական զենք չի մատակարարի Թուրքիային։

«Այսօրվա Թուրքիան Միջերկրական ծովում ապակայունացնող գործոն է, և դրա արտահայտումը  casus belli-ի մասին հայտարարությունն է, Հունաստանի դեմ պատերազմի սպառնալիքի մասին հայտարարությունը։ Աննախադեպ բան. դա մոլորակի միակ երկիրն է, որը պատերազմի սպառնալիք է ներկայացրել մեկ այլ երկրի՝ այն պարագայում, որ այդ մյուս երկիրն օգտվում է իր օրինական իրավունքից»,- ասել է Դենդիասը։

Հիշեցնենք, որ շաբաթներ առաջ Թուրքիան և Իսպանիան ռազմական համագործակցության մասին համաձայնագիր էին ստորագրել, ինչն առաջացրել էր Հունաստանի զայրույթը։ Դրանից անմիջապես հետո իսպանացի ԱԳՆ ղեկավարը շտապեց Աթենք` պարզաբանումներ տալու ԵՄ և ՆԱՏՕ անդամ դաշնակցին: