Միխեիլ Սահակաշվիլին հայց կներկայացնի Ուկրաինայի դատախազություն՝ իր առևանգման փաստով

Վրաստանի նախկին նախագահ Միխեիլ Սահակաշվիլին հայտարարել է, որ հոկտեմբերի 2-ին հայց է ներկայացնելու  Ուկրաինայի գլխավոր դատախազություն՝ իր առևանգման և նախկին նախագահ Պյոտր Պորոշենկոյի հրամանով իրեն արտաքսելու փաստով: Այս մասին Սահակաշվիլին հայտարարել է Facebook  սոցիալական ցանցով:

Սահակաշվիլին հայտարարել է, որ ապօրինաբար առևանգվել էր Պորոշենկոյի անվտանգության աշխատակիցների և մասնավոր թիկնապահների կողմից, որոնք հագնել էին սահմանապահների համազգեստ: «Միայն դա բավական է երկարաժամկետ դատավճռի համար»,- Սահակաշվիլիի խոսքերն է մեջբերում «Ռեգնում» գործակալությունը:

Ավելի վաղ՝ սեպտեմբերի 30-ին, Սահակաշվիլին հայտարարել էր, որ մոտակա ամիսներին պատրաստվում է այցելել Վրաստան, որտեղ պատրաստվում է վերականգնել քաղաքացիությունը: