Գործարկվել է Իրաք-Իրան-Հայաստան առաջին ավտոբուսային երթուղին

Իրաքի տրանսպորտի նախարարությունը հայտարարել է, որ շաբաթ օրն առաջին անգամ գործարկվել է դեպի Հայաստան առաջին իրաքյան ավտոբուսային երթուղին. հաղորդում է kurdistan24.net կայքը:

Նախարարության հայտարարության համաձայն` միջազգային տրանսպորտի զարգացումը  հարևան ու տարածաշրջանային պետությունների հետ բխում է երկրի շահերից:

Ավտոբուսները կանցնեն Իրաքի արևելքից դեպի Իրան, այնուհետև` Հայաստան, ինչը, ըստ հաղորդագրության, «նոր հորիզոններ» է բացում իրաքցիների համար` զբոսաշրջության տեսանկյունից:

Իրաք-Իրան երթուղիները վերջին տարիներին մեծ թափ են ստացել, բայց այս նոր հնարավորությունը կօգնի իրաքցիներին, որոնք բողոքում էին խիստ սահմանափակումների համար: 2018 թ. Henley Passport Index-ի համաձայն` Իրաքի ու Աֆղանստանի անձնագրերն ամենաքիչն են դրանց տերերին ճանապարհորդելու հնարավորություն տալիս:

Նախարարությունը հաղորդում է, որ շաբաթ օրվա ուղևորությունը դեռևս փորձնական է, և այս ամսվա վերջին նախատեսվում է Իրաքի, Իրանի և Հայաստանի միջև եռակողմ հանդիպում` հաղթահարելու համար բոլոր խոչընդոտները: