Իրանի ՊՆ-ն հանդիպել է Ռուսաստանի և Չինաստանի իր գործընկերների հետ

Իրանի պաշտպանության նախարար, գեներալ-մայոր Ամիր Հաթամին երեկ Մոսկվայում հանդիպել է Ռուսաստանի եւ Չինաստանի պաշտպանության նախարարների հետ. տեղեկացնում է Parstoday-ը:

ՌԴ պաշտպանության նախարար Սերգեյ Շոյգուի հետ հանդիպման ժամանակ կողմերը քննարկել են տարածաշրջանային վերջին իրադարձությունները: Քննարկման առանցքն են եղել  Եմենում, Իրաքում եւ Աֆղանստանում իրավիճակը, ինչպես նաեւ Սիրիայի վերջին զարգացումները:

Կողմերն անդրադարձել են նաեւ Իրանի եւ Ռուսաստանի միջեւ պաշտպանական ոլորտում համագործակցության ամրապնդման ուղիներին:

Չինաստանի պաշտպանության նախարար Վեյ Ֆենգհեի հետ հանդիպման ժամանակ կողմերն ընդգծել են Իրան-Չինաստան բազմակողմանի հարաբերությունների կարեւորությունը` նշելով, որ երկու երկրների միջեւ ձեւավորված հարաբերությունները, այդ թվում` պաշտպանական ոլորտում, կշարունակեն ընդլայնվել:

Հանդիպումները տեղի են ունեցել Մոսկվայում անցկացվող Միջազգային անվտանգության 8-րդ կոնֆերանսի շրջանակում: