«Ինքներս մեզ հարցնենք, թե ինչ ենք արել բանակի համար, նոր պահանջատիրական դիրքերից հանդես գանք»

Այսօր ՀՀ ԱԺ պաշտպանության, ազգային անվտանգության և ներքին գործերի մշտական հանձնաժողովը լսումներ է կազմակերպել` «Պահեստազորային պատրաստության համակարգի կատարելագործումը» թեմայով:

Հիմնական զեկուցող` ՀՀ ԶՈՒ գլխավոր շտաբի կազմզորահավաքային վարչության պետ Կամո Քոչունցին հարց ուղղեց «Ժառանգություն» խմբակցության պատգամավոր Թևան Պողոսյանը, թե ՊՆ-ն ի՞նչ դասեր է քաղել ապրիլյան պատերազմից, ի՞նչ փոփոխություններ են կրել պահեստազորայինների պատրաստվածության հետ կապված խնդիրները:

Կամո Քոչունցը նշեց, թե ինչ դասեր քաղել են ապրիլյան պատերազմից, դա գաղտնիք է, իսկ, ընդհանուր առմամբ, ապրիլին շատ են եղել Սփյուռքից կամավորականները, ովքեր ցանկացել են մասնակցել ռազմական գործողություններին, և նրանց հետ իրականացվել են պահեստազորային պատրաստության դասընթացներ: «Մատների արանքով չի նայվել պահեստազորայինների պատրաստվածության հարցին` թե' մինչև ապրիլ, թե' ապրիլից հետո»,- ասաց նա:

Թևան Պողոսյանն արձագանքեց` ասելով, որ մեր երկիրը կանգնած է անվտանգության հետ կապված մշտական մարտահրավերների առաջ, որոնք դառնալու են սերունդների համար մարտահրավեր, ուստի ռեալ փոփոխություններ են պետք ԶՈՒ-ում, և որ հասարակությանն արագորեն պետք է պատրաստեն, որ բոլորը «դուխով դիմակայեն» փորձություններին:

«Գուցե շատ բան գաղտնի է, բայց, միևնույն է, օրենքով են կարգավորելու շատ բաներ, իսկ օրենքը հրապարակային է»,- ասաց պատգամավորը:

Թևան Պողոսյանի արձագանքը դուր չեկավ պաշտպանության փոխնախարար Արա Նազարյանին: «Վրդովված տոնով եք խոսում, պահանջատիրական: Եկեք ամեն մեկս մեզ հարցնենք, թե ինչ ենք արել բանակի համար, նոր պահանջատիրական դիրքերից հանդես գանք: Անում ենք այն, ինչի հնարավորությունը ունենք, մենք վարդագույն ակնոցներով չենք նայում: Խնդրում եմ` եկեք ազնիվ լինենք, ըմբռնումով մոտենանք»,- ասաց Արա Նազարյանը: