Կուսակցական պատկանելություն չունեցող ակտիվիստների բողոքի ցույցը. Reuters-ի անդրադարձը

Երկուշաբթի Հայաստանի մայրաքաղաք Երևանում մի քանի հազար մարդ բողոքի ցույցի են դուրս եկել՝ ընդդեմ էլեկտրաէներգիայի սակագնի բարձրացման մասին վերջին որոշման. գրում է Reuters-ը:

Կայքը նշում է, որ մոտ 5000 ցուցարար բողոքի երթով հասել է նախագահի նստավայր, բայց, հանդիպելով ոստիկանների դիմադրությանը, նստացույց սկսել՝ փակելով երթևեկությունը:

«Բողոքի ցույցը, որը կազմակերպվել է քաղաքական որևէ կուսակցական պատկանելություն չունեցող ակտիվիստների կողմից, սկսվեց այն բանից հետո, երբ, Հանրային ծառայությունները կարգավորող հանձնաժողովի որոշմամբ, անցած շաբաթ ընդունվեց էլեկտրաէներգիայի սակագինը 17-ից 22 տոկոս բարձրացնող որոշում, որը գործելու է օգոստոսի 1-ից»,-տեղեկացնում է պարբերականը` հավելելով. «3,2 միլիոն բնակչությամբ նախկին խորհրդային հանրապետություն Հայաստանը Ռուսաստանի տնտեսական անկման հետևանքով ծանր հարված էր արդեն ստացել,ինչն էլ, իր հերթին վնասել էր արտահանմանն ու Ռուսաստանում հայ աշխատողների դրամական փոխանցումներին»: