Բնակարանը, մեքենան ու գրասենյակը` ցմահ` Տեր-Պետրոսյանին

Այսօր ԱԺ սոցիալական հարցերի մշտական հանձնաժողովի նիստում քննարկվում էր «ՀՀ Նախագահի վարձատրության, սպասարկման անվտանգության ապահովման մասին» օրենքում լրացումներ եւ փոփոխություն կատարելու մասին հարցը:

Նախկին օրենքի համաձայն`  ՀՀ պաշտոնաթող նախագահի գրասենյակի ծախսերը պետության հաշվին են կատարվում, տրվում է համապատասխան բնակարան, ավտոմեքենա և գրասենյակ` մինչև  նախկին նախագահի 70 տարին լրանալը, իսկ գրասենյակը` ցմահ: Ներկայացվող փոփոխությամբ` առաջարկվում է օրենքից հանել «մինչև 70 տարին լրանալ» բառերը, և այդպիսով` բնակարանը, մեքենան ու գրասենյակը  կտրամադրվեն ցմահ:

Երկրորդ փոփոխությամբ սահմանվում է պաշտոնաթող նախագահի կենսաթոշակի չափը:  Ըստ այդմ`  նախկին նախագահի կենսաթոշակը կկազմի գործող  նախագահի  աշխատավարձի 70 տոկոսը:

Նախագիծը դրվեց քվեարկության և ընդունվեց միաձայն: Այն կընդգրկվի վաղը մեկնարկող արտահերթ նստաշրջանի օրակարգում: Այս փոփոխություններն առայժմ տարածվելու են ՀՀ առաջին նախագահ Լևոն Տեր-Պետրոսյանի վրա, սակայն հանձնաժողովի անդամները նշեցին, որ այն անդրադառնալու է նախագահի ընդհանուր ինստիտուտի վրա: