Իրավապաշտպանը չի կարողանում ազատվել վիրավորանքից

Այն, որ Պոդոլսկի ողբերգությունն օգտագործվեց հակահայ քարոզչության համար, ակնհայտ է: Այս մասին «Մեդիա կենտրոն»-ում հայտարարեց Հայաստանի հելսինկյան կոմիտեի նախագահ Ավետիք Իշխանյանը` մեկնաբանելով 18 մարդու կյանք խլած վթարին մասնակից հայ վարորդ Հրաչյա Հարությունյանի իրավունքների խախտմանը:

Ըստ նրա` վարորդին  կանացի խալաթով դատարան բերելը ոչ թե ռուս իրավապահ մարմինների որոշումն էր, այլ քաղաքական դիտավորություն:

«Սա արհամարհանք էր Հայաստան պետության նկատմամբ: Ես սա ասում եմ, ոչ միայն որպես Հայաստանի քաղաքացի: Եթե նույն կադրերը տեսնեի այլ երկրում, նույն ապրումները կունենայի: Մինչև հիմա չեմ կարողանում այդ վիրավորանքից դուրս գալ»,- ասաց Իշխանյանը:

Իրավապաշտպանի խոսքով` ՌԴ-ն, լինելով Եվրախորհրդի անդամ, իրավունք չուներ մարդուն այդ կերպ նսեմացնել: «Ես չեմ ուզում բանավիճել ռուս որևէ իրավաբանի կամ քաղաքագետի հետ, քանի որ ակնհայտ է, որ դա վիրավորանք էր մեր երկրին»,- կրկնեց նա:

Իշխանյանն ասաց նաև, որ երեկ ՌԴ դեսպանատան մոտ տեղի ունեցած ակցիայի ժամանակ զրուցելով Հրաչյայի հարազատների հետ, վստահ կարող է հայտնել, որ նրա ընտանիքը այն լավագույն ընտանիքներից է, որ սիրում է իր երկիրը և միտք էլ  չունի արտագաղթելու: