Էկվադորին Սնոուդենի հարցով որոշում կայացնելու համար մի քանի ամիս կպահանջվի

Էկվադորի ԱԳՆ ղեկավար Ռիկարդո Պատինիոն հունիսի 26-ին հայտարարել է, որ Կենտրոնական հետախուզական վարչության նախկին աշխատակից Էդվարդ Սնոուդենին ապաստան տրամադրելու վերաբերյալ որոշում կայացնելու համար կարող է մի քանի ամիս պահանջվել. հայտնում է Associated Press-ը:

Մեկնաբանելով տվյալ հարցը` երկրի ԱԳՆ ղեկավարը հիշեցրել է, որ WikiLeaks-ի հիմնադիր Ջուլիան Ասանժի նմանատիպ խնդրանքի վերաբերյալ որոշում կայացնելու համար պահանջվել է 2 ամիս:

ԱՄՆ-ում Սնոուդենին մի շարք հոդվածներով մեղադրանք է առաջադրվել, մասնավորապես` լրտեսության և պետական միջոցների յուրացման մեղադրանքներ: 2013-ի հունիսի սկզբին Սնոուդենը, ով մինչ 2009 թվականը աշխատել է ԿՀՎ-ում, լրագրողներին PRISM գաղտնի ծառայության մասին տեղեկություններ է տրամադրել: PRISM-ը հնարավորություն է տալիս հատուկ ծառայություններին հեռախոսազրույցների գաղտնալսում իրականացնել: Գաղտնալսված զրույցների թվում էին նաև ՌԴ վարչապետ Դմիտրի Մեդվեդևի հեռախոսազրույցները: