Վերականգնմանս համար կպահանջվի եւս մի քանի ամիս. Լևոն Հայրապետյան

Հայաստանի ազգային հավաքականի պաշտպան Լևոն Հայրապետյանը շարունակում է հետվնասվածքային վերականգնողական գործընթացը Գերմանիայում:

Լեւոն Հայրապետյանը  վնասվածք էր ստացել 2012 թ. սեպտեմբերի 11-ին` Աշխարհի 2014 թ. առաջնության ընտրական փուլի Բուլղարիա-Հայաստան հանդիպման ժամանակ:

Ինչպես ՀՖՖ պաշտոնական կայքի հետ զրույցում նշել է Լևոն Հայրապետյանը, ինքը դեռևս շարունակում է բուժվել գերմանական Ռեգենսբուրգ քաղաքի կլինիկաներից մեկում:

«Առայժմ մարզվում եմ անհատապես՝ թեթև ծրագրով և առանց մեծ ծանրաբեռնվածությունների: Բժիշկները նշում են, որ վերականգնումս ընթանում է նորմալ հունով, բայց լիարժեք ապաքինման համար կպահանջվի ևս մի քանի ամիս: Եթե ամեն ինչ լինի այնպես, ինչպես նախատեսվում է, մայիսի կեսերին կկարողանամ լիարժեք մարզվել իմ ակումբի կազմում»,- ՀՖՖ պաշտոնական կայքին ասել է Լևոն Հայրապետյանը: