Ճապոնիայի վերականգնման համար կպահանջվի 300 մլրդ դոլար

Երկրաշարժից վնասված ճապոնական «Ֆուկուսիմա-1» ատոմակայանում շարունակվում են երրորդ ռեակտորի թաղանթի վնասված տեղերի որոնման աշխատանքները. այսօր տեղեկացրել է միջուկային անվտանգության կառավարական հանձնաժողովի ներկայացուցիչը:

Երեկ հիվանդանոց են տեղափոխել ատոմակայանի երեք աշխատակցի` ճառագայթային այրվածներով. տեղեկացնում է mignews.com կայքը:

Ատոմակայանում գրանցվել է ճառագայթման աճ, կանգնեցվել է երկու ռեակտորների աշխատանքը: Նախնական տվյալներով` ճառագայթման ավելացման պատճառը էներգաբլոկների ստորին մասում հավաքված ջուրն է: Ռադիոկակտիվ ջուր է կուտակվել նաեւ երրորդ էներգաբլոկի սարքավորումների սրահում:

Ճապոնիայի կառավարության հաշվարկներով` երկրի վերականգնման համար կծախսվի ավելի քան 300 մլրդ դոլար:

Երկրաշարժից եւ ցունամիից զոհվածների թիվն արդեն 10 հազար է, ավելի քան 17 հազար մարդ համարվում է անհայտ կորած, մոտ 3 հազարը վիրավոր են: