Հանրային ռադիոյի ղեկավարը` ազատ խոսքի "երաշխավոր"

Երեկ ՏԻՄ ընտրություններին ԼՂՀ նախագահ Բակո Սահակյանն առանց առաջին տիկնոջ էր եկել։ Լրագրողների հետ ճեպազրույցում Արցախի Հանրային ռադիոյի լրագրող Բելլա Լալայանը նախագահից հետաքրքրվեց՝ առաջին տիկինը չի՞ քվեարկելու։ Ի պատասխան` նախագահը տեղեկացրեց, որ նա հանրապետությունում չէ։

Պարզվում է` լրագրողի հարցը  խիստ վրդովեցրել է Արցախի Հանրային հեռուստառադիոընկերության խորհրդի նախագահ Նորեկ Գասպարյանին: Նա իր մոտ է կանչել լրագրողին ու վիրավորել։ Այս մասին Բելլա Լալայանն այսօր գրառում է կատարել ֆեյսբուքյան իր էջում։

Ընդ որում` առաջին անգամ չէ, որ Նորեկ Գասպարյանը նման պահվածք է դրսեւորում, լրագրողն էլի է անդրադարձել դրան։

Ցավոք, վերջին շրջանում Արցախում լրագրողների հանդեպ նման վերաբերմունք շատ է պատահում: Դեպի ո՞ւր ենք գնում, մի՞թե այդպես պետք է ժողովրդավարություն կառուցենք։