Հայ բժիշկները կվերապատրաստվեն Իտալիայում

ՀՀ առողջապահության նախարար Հարություն Քուշկյանը հանդիպել է Հայաստանում Իտալիայի արտակարգ և լիազոր դեսպան Բրունո Սկապինիի, ինչպես նաև Իտալիայից ժամանած բժիշկների հետ:

Հանդիպման ընթացքում կողմերը քննարկել են համագործակցության եզրերը, մասնավորապես` ուղղված ինտեգրված բժշկության ոլորտին:

Դեսպանը նշել է, որ շտապ օգնության արդիականացման ծրագիրը Հայաստանում իսկապես կայացել է, որին ականատես են եղել իտալացի բժիշկները: Հյուրերն առաջարկել են համագործակցության շրջանակներում հայ բժիշկներին վերապատրաստել Իտալիայում, ինչպես նաև տեղեկատվություն փոխանակել բժշկական արձանագրությունների և մեթոդների վերաբերյալ:

Վերջիններս նաև ցանկություն են հայտնել ուսումնասիրել Հայաստանի բուժհաստատությունների փորձը` պարբերաբար այցելություններ կազմակերպելով: