Խաղաղության դիմաց միայն խաղաղություն

Ղարաբաղյան հակամարտության կարգավորումը պետք է հիմնված լինի փոխզիջումների վրա, իհարկե, զիջումները միակողմանի չպիտի լինեն: Միայն այդ դեպքում է հնարավոր համապարփակ խաղաղությունը. Военный дипломат ամսագրին տված հարցազրույցում ասել է ԼՂՀ նախագահ Բակո Սահակյանը:

«Հարկավոր է գիտակցել, որ 1988 թվականի իրավիճակին վերադարձ` ինչպես կարգավիճակի, այնպես էլ տարածքային հարցերում, լինել չի կարող»,- ասել է նա եւ հավելել, որ հակամարտության հանգուցային քաղաքական ասպեկտները կարգավիճակի եւ անվտանգության հարցերն են, մյուս հարցերը ածանցվում են դրանցից:

ԼՂՀ նախագահն ընդգծել է, որ «խաղաղություն տարածքների դիմաց» սկզբունքը ոչ միայն անընդունելի է, այլեւ հղի է տարածաշրջանի համար անկանխատեսելի հետեւանքներով: Բացի դրանից` փոխզիջումներն էլ պետք է համարժեք լինեն. խաղաղության դիմաց միայն խաղաղություն կարելի է առաջարկել:

Ինչ վերաբերում է հակամարտության գոտում խաղաղապահների տեղակայմանը, ըստ Արցախի նախագահի, այն աշխարհում միակ տարածքն է, որտեղ հրադադարի ռեժիմը պահպանվում է դիմակայության կողմերի ուժերով: Դա արդեն նվաճում է, որը ցույց է տալիս, որ կողմերը կարող են առանց արտաքին միջորդության պահպանել խաղաղությունը:

Ըստ Բ. Սահակյանի` խաղաղապահների տեղակայման հարցը լրջորեն կարելի է քննարկել միայն կարգավորման վերջին փուլում, երբ կողմերը համաձայնության գան հիմնական հարցերի շուրջ, եւ սկսվի պայմանավորվածությունների իրականացման փուլը: