Իրանի խորհրդարանն ընդդեմ նախագահի

Այսօր Իրանի խորհրդարանը հայտարարել է, որ երկրի նախագահ Մահմուդ Ահմադինեժադը օրենք է խախտել` իրեն նավթարդյունաբերության նախարար հայտարարելով. տեղեկացնում է իրանական «Մեհր» գործակալությունը:

Անցյալ ամիս նախագահը պաշտոնանկ էր արել նավթարդյունաբերության նախարար Մասուդ Միրքազեմիին` նախարարությունների թվի կրճատման պատրվակով: Դա լրջորեն անհանգստացրել էր Իրանի իշխող պահպանողական վերնախավին:

Իրանական օրենքների համաձայն` նախագահն իրավունք ունի աշխատանքից ազատել նախարարներին եւ նշանակել նրանց պաշտոնակատարների` 3ամիս ժամկետով` մինչեւ խորհրդարանական քննարկումները:

Սակայն այն, որ Ահմանդինեժադն իր ձեռքն է վերցրել նավթարդյունաբերության ղեկավարումը, ընկալվել է որպես իշխանության զավթում, նավթադոլարների կոշտ վերահսկողություն:

«Դա անօրինական միջամտություն է պետական ֆինանսական ռեսուրսների կառավարմանը»,- ասվում է խորհրդարանի զեկույցում: