Լիբիացի ապստամբները պատրաստ են զինադադար կնքել

Լիբիացի ապստամբների ղեկավար Աբդել Ջալիլն այսօր մամուլի ասուլիսի ժամանակ հայտարարել է, որ համաձայն են ժամանակավոր զինադադար կնքել` պայմանով, որ կառավարական զորքերը կլքեն երկրի արեւմտյան քաղաքները` ապահովելով դրանց բնակիչների խոսքի ազատությունը:

Ջալիլը հերթական անգամ հայտարարել է, որ իրենց զենք պետք կլինի, եթե Քադաֆիի ուժերը «շարունակեն ճնշել խաղաղ բնակչությանը»:

Նշենք, որ երեկ ՆԱՏՕ-ի գլխավոր քարտուղար Անդերս Ֆոգ Ռասմուսենը հանդես էր եկել լիբիացի ապստամբներին զինելու գաղափարի դեմ: Ստոկհոլմում լրագրողների հետ հանդիպման ժամանակ նա ասել է, որ «հարկավոր է պաշտպանել Լիբիայի ժողովրդին, ոչ թե զինել»:

Վերջին օրերին Քադաֆիին հավատարիմ ուժերը, չնայած կոալիցիոն ուժերի ավիահարվածներին, մի շարք հաջող գործողություններ են իրականացրել: «Ֆրանս պրեսի» տվյալներով` այսօր առավոտյան ճակատային գիծն անցել է Բենգազիի բանալի համարվող Աջաբիա քաղաքից 40 կմ հեռավորության վրա: