Հայկական պարերը վերածնվեցին Սուրբ Կիրակոս եկեղեցում

Դիարբեքիրի Սուր շրջանի Սուրբ Կիրակոս հայկական եկեղեցում տեղի ունեցավ հայկական ավանդական ժողովրդական պարերի եռօրյա սեմինար: Ֆրանսիայում գործող «Երկիր» հաստատության և «Գամագ» ժողովրդական պարային համույթի հետ համատեղ կազմակերպված միջոցառումը վերածնեց Դերսիմի, Խարբերդի, Մարդինի և Դիարբեքիրի գրեթե մոռացված հայկական պարերը:

Միզգին Թաբու

Միջոցառման նկատմամբ հետաքրքրությունը սահմանափակված չէր միայն հայկական համայնքով։ Սեմինարներին մասնակցեցին նաև քրդեր, թուրքեր և տարբեր հավատքների բազմաթիվ մասնակիցներ։ Երեք օր միասին պարեր սովորած մասնակիցները Սուրբ Կիրակոս հայկական եկեղեցու բակում ձեռք ձեռքի տված պարեցին ավանդական հայկական պար՝ մասնակցելով մշակութային հանդիպմանը։

«Այսպիսի հանդիպումները հույս են ներշնչում»

Նախագծի թարգմանիչ, քաղաքացիական հասարակության աշխատակից և համակարգող Նիլ Դելահայեն նշել է, որ սեմինարները նպաստել են միջմշակութային երկխոսությանը։

Դելահայեն նշել է, որ իրենք Ֆրանսիայում գործող «Երկիր» հաստատության և «Գամագ» ժողովրդական պարային համույթի հետ նմանատիպ սեմինարներ են կազմակերպել Դերսիմում, Խարբերդում, Մարդինում և Դիարբեքիրում՝ հավելելով, որ իրենց նպատակն է վերակենդանացնել ավանդական հայկական պարերը այն տարածաշրջանում, որտեղ դրանք ծագել են։ Դելահայեն ընդգծելով տարածաշրջանում 2015 թ․ առաջ հաստատված միջմշակութային հարաբերությունների վերականգնման կարևորությունը՝ ասաց. «Աշխատաժողովներին միասին մասնակցեցին տարբեր տարիքային խմբերի մարդիկ, ովքեր փորձում են կենդանի պահել հայկական ինքնությունը, ինչպես նաև թեմայով հետաքրքրված քուրդ մասնակիցներ: Նույն միջավայրում տարբեր ծագում ունեցող մարդկանց հանդիպումը և միմյանց նկատմամբ նրանց հետաքրքրասիրությունը երկխոսության ամենակարևոր սկիզբն է: Հետևաբար, ես այս նախագիծը համարում եմ ապագայի համար հույս ներշնչող քայլ»:

«Կրկին զգացինք հին Դիարբեքիրի ոգին»

Սուրբ Կիրակոս հայկական եկեղեցու հիմնադրամի փոխնախագահ Գաֆուր Թուրքայը նույնպես ասաց, որ միջոցառումը կարևոր է մշակութային հիշողությունը կենդանի պահելու առումով: Թուրքայը նշեց, որ նշանակալից է, որ Սուրբ Կիրակոսում վերածնվել են մոտ մեկ դար առաջ այս հողերում ներկայացված հայկական ժողովրդական պարերը՝ հավելելով. «Այս պարերը տարիներ առաջ ներկայացվել են Դիարբեքիրի փողոցներում և հարսանիքներին։ Ժամանակի ընթացքում դրանք մոռացվել են։ Մեզ համար շատ արժեքավոր է, որ դրանք այսօր իրենց ձայնը վերագտնում են այստեղ։ Քանի դեռ Սուրբ Կիրակոսի դռները բաց են, այն կշարունակի հյուրընկալել մշակութային և գեղարվեստական ​​միջոցառումներ»։ Նշելով, որ միջոցառմանը մասնակցել են տարբեր էթնիկ խմբերի մարդիկ, Թուրքայը ասաց. «Այսօր այստեղ միայն հայեր չեն։ Քրդերը, թուրքերը և տարբեր հավատքների մարդիկ միասին են պարում։ Մենք բոլորս միասին՝ ձեռք ձեռքի տված, պարում ենք հալայ։ Այս տեսարանը մեզ հիշեցնում է հին Դիարբեքիրի համակեցության մշակույթը»։

«Ուրախ եմ, որ եկա»

Սեմինարին մասնակցածներից մեկն ասաց, որ միջոցառման մասին իմացել է ընկերոջից՝ նշելով. «Մենք ժամերով պարեցինք, հոգնեցինք, բայց դա շատ գեղեցիկ փորձառություն էր: Ես միշտ սիրել եմ տարբեր մշակույթների ժողովրդական պարերը: Չնայած որոշ պարերի անունները նույնն էին, ինչ մենք գիտենք, ֆիգուրները տարբեր էին: Ես վայելեցի դրանք․ ուրախ եմ, որ եկա»:

Եռօրյա միջոցառումն ավարտվեց Սուրբ Կիրակոս հայկական եկեղեցու բակում մասնակիցների կատարած հալայով:

https://nehaberajansi.com/haber/surp-giragosta-ermeni-danslari-yeniden-hayat-buldu-20260726

Թարգմանեց Տիգրան Չանդոյանը

www.akunq.net