Տիգրանակերտի Սբ Կիրակոս եկեղեցում պատարագ է մատուցվել

Տիգրանակերտի Սբ Կիրակոս եկեղեցում այս տարվա երկրորդ պատարագն է մատուցվել, որին ներկա է եղել նաև Պոլսո հայոց պատրիարքի փոխանորդ Արամ արքեպիսկոպոս Աթեշյանը։ Այս մասին տեղեկացնում է «Ակօս»-ը:

Պատարագին մասնակցել են նաև աշխարհի տարբեր կողմերից եկած հայեր, իսկ Հայաստանից ժամանած պարախումբը եկեղեցու բակում ազգային երգ ու պար է ներկայացրել։ Ներկայացմանը ներկա են նաև եղել Սուրի նախկին քաղաքապետ Աբդուլլահ Դեմիրբաշը և Տիգրանակերտի տարբեր հասարակական կազմակերպությունների ներկայացուցիչներ։

Պատարագից առաջ լրագրողների հետ զրույցում Արամ արքեպիսկոպոս Աթեշյանը նշել է, որ եկեղեցու վերանորոգման աշխատանքների 95%-ն ավարտվել է, և վերանորոգման ծախսերը հոգացել են համայնքն ու Տիգրանակերտի քաղաքապետարանը։

Աթեշյանն անդրադարձել է նաև քրդական հարցին` ասելով. «Յուրաքանչյուր պատարագի ընթացքում խաղաղության համար եմ աղոթում։ Քուրդ-թուրքական խնդրի կարգավորումը միայն այդ ազգերի հարցը չէ, այլ առնչվում է բոլորին: Մեկի հանգստությունը բոլորի հանգստությունն է, մեկի ցավը՝ բոլորի ցավը»: