«Արժանապատիվ Հայերի Միություն» ՀԿ-ն իր աջակցությունն է հայտնել «Հայաստան» դաշինքին․ հայտարարություն

«Արժանապատիվ Հայերի Միություն» ՀԿ-ն հայտարարություն է տարածել, որը ներկայացնում ենք ստորև․

«Սիրելի՛ հայրենակիցներ,

Հայաստանը կանգնած է պատմական նշանակության ընտրության առաջ։ Մեր պետության անվտանգությունը, ազգային արժանապատվությունը, սահմանների պաշտպանությունը և սերունդների ապագան կախված են այն որոշումներից, որոնք կայացվում են այսօր։

«Արժանապատիվ Հայերի Միություն» հասարակական կազմակերպությունը, գնահատելով երկրի առջև ծառացած մարտահրավերները և դրանց հաղթահարման համար անհրաժեշտ առաջնորդական կարողությունները, հայտարարում է իր աջակցությունը «Հայաստան» դաշինքին։

Մենք համոզված ենք, որ այս դժվար ժամանակաշրջանում Հայաստանին անհրաժեշտ են փորձառություն, վճռականություն, պետական մտածողություն և ուժեղ կամք։ Այդ հատկանիշները տարիների ընթացքում դրսևորել է Հայաստանի Հանրապետության երկրորդ նախագահ Ռոբերտ Քոչարյանը, որը ղեկավարել է երկիրը բարդ ժամանակներում, կայացրել պատասխանատու որոշումներ և իր գործունեությամբ ապացուցել պետական կառավարման փորձի կարևորությունը։

Այսօր, առավել քան երբևէ, մեր ժողովրդին անհրաժեշտ է ազգային միասնություն, վստահություն սեփական ուժերի նկատմամբ և պատրաստակամություն՝ պաշտպանելու Հայաստանի ու Արցախի հայության կենսական շահերը։

Մենք կոչ ենք անում Հայաստանի Հանրապետության բոլոր քաղաքացիներին չմնալ անտարբեր, մասնակցել հանրային և քաղաքական կյանքին, համախմբվել հանուն ուժեղ, անվտանգ և արժանապատիվ Հայաստանի և իրենց աջակցությունը հայտնել «Հայաստան» դաշինքին։

Մեր երկրի ապագան կերտվում է ոչ թե հուսահատությամբ, այլ կամքով, պատասխանատվությամբ և պայքարելու պատրաստակամությամբ։

Թող յուրաքանչյուր հայ իր ներդրումն ունենա ազգային վերածննդի և պետականության ամրապնդման գործում։

Միասնությամբ՝ հանուն հզոր և արժանապատիվ Հայաստանի»։