Ուկրաինական անօդաչուները հարվածել են ՌԴ Բելգորոդի մարզին

ՌԴ Բելգորոդի մարզին Ուկրաինայի զինված ուժերի անօդաչուների հարվածների հետևանքով 7 խաղաղ բնակիչ է վիրավորվել, հայտնել է մարզպետ Վյաչեսլավ Գլադկովը Telegram–ի իր ալիքում։

Նրա խոսքով՝ Բելգորոդում չորս բնակիչ է վիրավորվել, որոնցից երեքը տուժել են բազմաբնակարանային շենքի մոտ անօդաչուի պայթյունի հետևանքով։

«Մեկ կին ոտքի բեկորային վնասվածք է ստացել, մեկ տղամարդ՝ աջ նախաբազկի բեկորային վնասվածք, երկրորդը՝ կրծքավանդակի ոչ թափանցող վերքեր։ Շտապօգնության բրիգադները նրանց տեղափոխում են Բելգորոդի թիվ 2 քաղաքային հիվանդանոց։ Եվս մեկ տղամարդ բժշկական օգնություն է ստացել ուսի շոշափող վնասվածքի համար, նա հրաժարվել է հոսպիտալացումից», – նշել է մարզպետը։

Միևնույն ժամանակ, Բելգորոդի մարզի Ստրելեցկոյե գյուղում առևտրային օբյեկտի մոտ անօդաչուի պայթյունի հետևանքով տարբեր վնասվածքներ են ստացել երեք խաղաղ բնակիչ, այդ թվում՝ 13-ամյա երեխա։