Եթե փայտով խփում եք ռուս արջին, մի՛ զարմացեք նրա արձագանքից. բրիտանացի եվրախորհրդարանականը 2014 թ. գուժել էր ռուս-ուկրաինական պատերազմը

2014 թ․-ին Եվրախորհրդարանի պատգամավոր Նայջել Ֆարաջն իր ելույթում կանխատեսել էր 8 տարի անց Արևելյան Եվրոպայում սկսվելիք պատերազմը:

«Մենք ունենք հակասությունների հսկայական ցուցակ՝ Լիբիայի ռմբակոծումը, Սիրիայում ապստամբներին զինելու՝ մեր ցանկությունը: Սրանք չարդարացված սադրանքներ էին Պուտինի դեմ։ Հենց եվրոպական կայսրությունն է, որ ընդարձակվելով պահանջում է Ուկրաինայի տարածքը՝ իրավիճակն էլ ավելի վատթարացնելու համար։

ՆԱՏՕ-ն նույնպես կցանկանար, որ Ուկրաինան միանա իր դաշինքին։ Մենք ուղղակիորեն աջակցում ենք Ուկրաինայում տեղի ունեցած հեղաշրջմանը, որը հանգեցրեց նախագահ Յանուկովիչի տապալմանը։ Եվ դա ստիպել է Պուտինին՝ արձագանքել։ Եթե փայտով խփում եք ռուսական արջին, մի՛ զարմացեք նրա արձագանքից։ 

Շտապելով պայմանագիր ենք կնքել Ուկրաինայի հետ, և ՆԱՏՕ-ի զինվորները համատեղ վարժանքներ են անցկացնում նրա տարածքում։ Մի՞թե մենք ընդհանրապես խելամիտ  ենք: Մենք լրջորեն պատերա՞զմ ենք ուզում Պուտինի հետ: Եթե՝ այո, ուրեմն մենք շարժվում ենք ճիշտ ուղղությամբ։ Հասկացեք, որ Արևմուտքն այժմ կանգնած է վերջին 70 տարվա ամենամեծ ճգնաժամի առջև», - հայտարարել էր նա: