Ղազախստանում անկարգություններից հետո ձերբակալվածների թիվը մոտեցել է 10 հազարի

Ղազախստանում անկարգությունների ձերբակալված մասնակիցների թիվը հասել է 9,9 հազարի. երեքշաբթի հայտնել է հանրապետության ՆԳՆ-ն։

«Իրավապահ մարմինների աշխատակիցները ձերբակալել են 9900 մարդու»,- մեջբերում է «Ինտերֆաքսը»։

Երեքշաբթի ավելի վաղ Ալմա Աթայի հրամանատարության տեղեկատվական կենտրոնը հայտնել էր, որ միայն վերջին մեկ օրվա ընթացքում քաղաքում ձերբակալվել է 1237 մարդ, «որոնք մասնակցել են ահաբեկչական հարձակումների, թալանի և այլ հանցագործությունների»։

Իր հերթին Ղազախստանի Ազգային անվտանգության կոմիտեի մամուլի ծառայությունը հայտնել է, որ հակաահաբեկչական գործողության սկզբից հակահասարակական գործողություններին մասնակցելու կասկածանքով սահմանային ծառայությունը բերման է ենթարկել 366 մարդու, որոնցից վեցը վիրավորվել են դիմադրելիս։