Հերթը Ղրիմինն է. թուրքական ընդդիմադիր կուսակցության քարտուղարը ողջունել է Արցախում թուրքական դրոշի բարձրացումը

Թուրքական ընդդիմադիր «İYİ» կուսակցության («Լավ») մամուլի քարտուղար և պատգամավոր  Յավուզ Աղրալիօղլուն թվիթերյան իր էջում, ի շարս թուրք այլ գործիչների, բացահայտ նշել է թուրքական պանթուրանական ծրագրերի հաջորդ թիրախները:

«Ես ողջունում եմ նրանց, ովքեր Ղարաբաղում կախել են թուրքական դրոշը: Փառք Ամենակարողին, 30-ամյա օկուպացիան ավարտվեց: Սա թուրքերի հաղթանակն է: Հաջորդը Արևելյան Թուրքեստանը, Ղրիմը, Քիրքուքն են»,– գրել է թուրք գործիչը։

Նշենք, որ Արևելյան Թուրքեստանը Չինաստանի Սինցզյան–ույղուրական ինքնավար շրջանն է, որի նկատմամբ Թուրքիան բազմիցս է հավակնություններ ներկայացրել, իսկ Քիրքուքը Իրաքի հյուսիսային քաղաքներից մեկն է (Թուրքիան արդեն ունի ռազմական ներկայություն Իրաքի հյուսիսային որոշ շրջաններում), համարվում  է Մերձավոր Արևելքի իսլամական հայտնի կենտրոններից մեկը, ինչպես նաև հայտնի է իր նավթային պաշարներով։