Կգա ժամանակը, կիմանաք. Արմեն Ամիրյանը՝ 2018-ին պաշտոնավարելու ցանկության մասին

ՀՀ մշակույթի նախարար Արմեն Ամիրյանը բամբասանքներին և բանսարկություններին չի պատասխանում: Խորհրդարանում լրագրողների հետ զրույցում այսպես նա պատասխանեց դիտարկմանը, թե իր աշխատանքից դժգոհ են և նոր նախարար են որոնում: Իր աշխատանքից գոհ են, թե` ոչ, Ամիրյանը նշեց, որ պետք է հարցնել նրանցից, ում գոհունակությունն ուզում են լսել:

Դիտարկմանը` հնարավոր է դժգոհությունները կապված են ցուցահանդեսի փակման, Վ. Արծրունու համերգի չկայանալու հետ, նախարարն արձագանքեց. «Ցուցահանդեսի և համերգի չեղարկումը մեր կառույցի հետ կապ չունի: Այդ հարցերի բարձրացումը էժանագին PR է»:

Դիտարկմանն էլ` հանդիպել է Սերժ Սարգսյանի հետ, Ամիրյանը պատասխանեց, որ շատերի հետ է հանդիպումներ ունենում և չի պատրաստվում բարձրաձայնել դրանց մասին: «Այն հանդիպումները, որոնք լուսաբանվում են, լուսաբանվում են»,- ասաց նա:

Հարցին` 2018 թվականից հետո պաշտոնավարելու ցանկություն կա՞, Արմեն Ամիրյանը պատասխանեց. «Կգա ժամանակը, կիմանաք: Ցանկությունը հասարակությունից է կախված»: