Մեզ միայն մի բան է անհանգստացնում` իրականում ժողովրդի քվեները տեղ կհասնե՞ն, թե՞ ոչ. Ատոմ Էգոյան

Տեղեկացրել էինք, որ Հայաստանում են «Արդարություն Հայաստանի» նախաձեռնության անդամները` այստեղ կայանալիք ընտրական գործընթացին հետևելու:

Այսօր` լրագրողների հետ հանդիպման ժամանակ, անվանի կինոռեժիսոր Ատոմ Էգոյանը նշեց, որ մեր երկրի ոսկորները բավականին խորն են, բայց ժողովուրդն իրականում մկանի պես բան է, որը պետք է մարզես, որ ուժեղանա. ժամանակն է դեպի ժողովրդավարություն քայլելու:

«Որոշումը, որ կիրակի չպետք է ընտրության գնանք, ինքնաբռնակալություն է, մենք չպետք է անտարբերությանը զոհ դառնանք: Մեր երկրին կարող է «մահ բերել» միայն անտարբերությունը: Մենք այստեղ չենք, որ ձեր ձայները պահպանենք, մենք այստեղ ենք ապագայի համար, այստեղ ենք, որ օգնենք երիտասարդներին` ապագան փոխել: Մեզ միայն մի բան է անհանգստացնում` իրականում ժողովրդի քվեները տեղ հասնելո՞ւ են, թե՞ ոչ»,- ասաց Էգոյանը:

Նա նշեց նաև, որ իրենք շրջելու են ընտրատեղամասից ընտրատեղամաս, հիմնականում մարզերում են լինելու և միայն օրվա վերջում են Երևանի ընտրատեղամասեր այցելելու: