Ավետիսյանների սպանության գործով կարևորագույն վկաները լքել են Հայաստանը

Գյումրիում տեղակայված ռուսական ռազմաբազայում շարունակվում է Ավետիսյանների սպանության գործով դատաքննությունը: Այսօրվա նիստը նախագահող դատավոր Հարություն Մովսեսյանն ընթերցեց ռուսական ռազմաբազայի կողմից ուղարկված գրությունն այն մասին, որ գործով որպես վկա ներգրավված` ռազմաբազայի 7 նախկին աշխատակիցները գտնվում են  Ռուսաստանի Դաշնությունում, եւ նրանց գտնվելու վայրի վերաբերյալ տեղեկություն տրամադրել իրենք չեն կարող:

Նշենք, որ հիշյալ վկաները գործի համար կարևոր նշանակություն ունեցող անձինք են, նրանց թվում է նաեւ Վալերի Պերմյակովի անմիջական հրամանատարը:

Մեղադրող դատախազի միջնորդությամբ դատարանն անցել է գործում եղած փաստաթղթերի հետազոտմանը: Այս պահին հրապարակվում է դեպքի վայրի զննության վերաբերյալ արձանագրությունը: