Ադրբեջանում գնդապետը կրակել է զինվորի վրա. ՊՆ-ը լռում է

Անցյալ շաբաթ Ադրբեջանի N զորամասում Թարիվերդիև Չինգիզ Այդին օղլուն գնդակահարվել է իր հրամանատարի կողմից. հայտնում է haqqin.az-ը՝ վկայակոչելով «Ազադլըիգ» թերթը, որը հրապարակել է  զինվորի հոր՝ Այդին Թարիվերդիևի նամակը Ադրբեջանի նախագահ Իլհամ Ալիևին:

Փամփուշտը դիպել է երիտասարդի գլխին, զինվորը տեղափոխվել է է Գյանջայում տեղակայված ռազմական հոսպիտալ:

Հոր խոսքերով՝  որդին գտնվում է ծայրահեղ ծանր վիճակում, սակայն  բժիշկները ոչ մի քայլ չեն ձեռնարկում` նրա կյանքը փրկելու համար:

«Միջադեպը փորձում են կոծկել, քանի որ այն տեղի է ունեցել անձնական կոնֆլիկտի հողի վրա:  Այս պատճառով էլ ոչ ոք չի հետաքրքրվում վիրավորի առողջությամբ: Մեր բոլոր դիմումները ռազմական դատախազություն ու պաշտպանության նախարարություն արդյունք չեն տալիս: Մեզ պարզապես չեն ցանկանում լսել»,- պատմել է զինվորի հայրը՝ դիմելով Ալիևին` տվյալ գործի հետաքննությունում աջակցելու խնդրանքով: