Սերտ համագործակցե՞նք, որ մեկը գա, դառնա նախագահ, ու հիմա էլ նրանի՞ց պահանջենք անցում խորհրդարանականին

Այսօր ԱԺ ՀՅԴ խմբակցության ղեկավար Արմեն Ռուստամյանը լրագրողների հետ զրույցում, պատասխանելով հարցին, թե ինչպե՞ս կվերաբերվի, եթե երկրորդ նախագահ Ռոբերտ Քոչարյանը որոշի վերադառնալ քաղաքականություն, ասաց. «Ես որևէ մեկի վերադարձին դեմ չեմ: Ինչո՞ւ էին հեռացել, որ հիմա էլ պիտի վերադառնան: Թող միշտ էլ լինեն քաղաքական դաշտում և իրենց փորձը, գիտելիքներն ի նպաստ բերեն մեր երկրին, ժողովրդին»:

Լրագրողները հետաքրքրվեցին, թե ՀՅԴ-ն կսատարի՞ արդյոք Ռ. Քոչարյանին` վերադարձի դեպքում: Ռուստամյանը նախ հայտարարեց, որ Դաշնակցությունը սատարելու է իր մոտեցումներին, հետո հավելեց. «Սա է ամբողջ խնդիրը, երբ մենք մեր մոտեցումներով ենք ներկայանում, ասում ենք` երկրորդական է անձը, հետո պարզվում է, որ այդ մոտեցումներից որևէ մեկը պաշտպանում են, ու այդ ժամանակ մեզ ասում են` դուք դա արել եք, որ մտնեք կոալիցիա, կամ սրան-նրան պաշտպանելու համար եք սա մտածել»:

Ըստ ՀՅԴ պատգամավորի` ընդդիմադիր դաշտում կուսակցություններ կան, որ չեն ընդունում ՀՅԴ-ի յոթ կետերը, սակայն ուզում են համագործակցել:

«Ինձ համար ի՞նչ տարբերություն, որ այն քաղաքական ուժերը, որ չեն ընդունում մեր յոթ կետերը, բայց ասում են` քանի որ մենք ընդդիմության մեջ ենք, եկեք իրար հետ սերտ համագործակցենք: Սերտ համագործակցենք, որ ի՞նչ, որ մեկը գա, դառնա նախագահ ու հիմա էլ իրենի՞ց պահանջենք, որ անցնենք խորհրդարանական համակարգի: Թե այն բանաձևն են օգտագործում, որ մենք գանք, հետո անենք: Դա նմանվում է նրան, որ` թողեք մի քիչ նստեմ ես այս աթոռին, հետո հանեք աթոռը տակից»,- ասաց պատգամավորը: