Արագածոտնի մարզպետը կորցրեց ինքնատիրապետումն ու սկսեց բղավել

Մնաց երկու՝ գյուղատնտեսության եւ սպորտի եւ երիտասարդության հարցերի նախարարների նշանակումը, որից հետո օրակարգ է գալիս մարզպետների նշանակման հարցը:

Մամուլում մեկ անգամ չէ, որ գրվել է Արագածոտնի մարզպետ Սարգիս Սահակյանի պաշտոնանկության մասին: Նրա դյուրագրգիռ պահվածքը մեր թղթակցի հետ զրույցում, կարծես, գալիս է ապացուցելու այն տեղեկությունը, որ Սահակյանին, իրոք, պաշտոնավարելու մի քանի օր է մնացել: Լսելով Yerkir.am-ի թղթակից հարցն՝ իր հնարավոր պաշտոնանկության մասին, Սարգիս Սահակյանը կորցրեց ինքնատիրապետումն ու բղավելով հայտարարեց. «Դուք բան ու գործ չունե՞ք, չեմ ասե՞լ` ինձ չզանգեք ու նման անլուրջ հարցեր չտաք: Դե մյուս անգամ չզանգեք»:

Նշենք, որ, ըստ մամուլի հրապարակումների, ՀՀ սպորտի և երիտասարդության հարցերի նախարարի տեղակալ Խաչիկ Ասրյանն է նշանակվելու Արագածոտնի մարզպետի պաշտոնում: Սակայն նա խուսափում է պատասխանել լրատվամիջոցների զանգերին: