Երեւանի քաղաքապետի ընտրությունը՝ նոյեմբերի 15–-ին

Այսօր գումարված արտահերթ նիստում Երևանի ավագանին միաձայն հաստատել է Երևանի քաղաքապետի ընտրության օրը:

Մինչ օրակարգի հարցին անցնելը նիստը նախագահող` Երևանի քաղաքապետի պաշտոնակատար Տարոն Մարգարյանն ավագանու անդամներին տեղեկացրել է, որ նախկին քաղաքապետ Կարեն Կարապետյանը նոյեմբերի 2-–ին, սեփական դիմումի համաձայն, հրաժարվել է նաև Երևանի ավագանու անդամությունից:

Հիմք ընդունելով Երևանի քաղաքապետի հրաժարականը և ղեկավարվելով «Երևան քաղաքում տեղական ինքնակառավարման մասին» ՀՀ օրենքի 45-րդ հոդվածի 2-րդ մասի 3-րդ կետով և 46-րդ հոդվածի 1-ին մասով` Երևան քաղաքի ավագանին որոշել է Երևանի քաղաքապետի արտահերթ ընտրությունների օրը սահմանել 2011 թվականի նոյեմբերի 15-ը. տեղեկացնում է Երևանի քաղաքապետարանի աշխատակազմի տեղեկատվության և հասարակայնության հետ կապերի վարչությունը: