Սերգեյ Փարաջանովի ցուցահանդեսը` Սան Պաուլոյում

Հոկտեմբերի 22-ին Սան Պաուլոյի 35-րդ միջազգային կինոփառատոնի շրջանակներում տեղի է ունեցել հայ ականավոր կինոռեժիսոր Սերգեյ Փարաջանովի կիրառական աշխատանքների ցուցահանդեսի բացումը:

Կինոփառատոնի շրջանակներում ցուցադրվել են Փարաջանովի հեղինակած ֆիլմերը, նաեւ նրա մասին պատմող վավերագրական կինոնկարներ: Միջոցառմանը զուգահեռ ներկայացվել են նաեւ հայ լուսանկարիչ, Երեւանի Փարաջանովի թանգարանի տնօրեն Զավեն Սարգսյանի` Հայաստանի մասին պատմող լուսանկարները:

Կինոփառատոնը  լուսաբանվել է բրազիլական մամուլով եւ հեռուստատեսությամբ, որոնք աշխարհահռչակ կինոգործչի աշխատանքների ցուցադրությունը գնահատել են որպես Սան Պաուլոյի մշակութային կյանքի` հոկտեմբեր ամսվա ամենակարեւոր միջոցառումը:

Ցուցահանդեսին մասնակցել են Բրազիլիայում ՀՀ դեսպան Աշոտ Եղիազարյանը, նահանգային եւ քաղաքային կառավարության անդամներ, մտավորականներ, բրազիլահայ համայնքի ներկայացուցիչներ, լրագրողներ: