Ճապոնիան էլ միացավ տոնական շքերթին

Սեպտեմբերի 15-ին Ճապոնիայում, Հայաստանի դեսպանության նախաձեռնությամբ եւ հովանավորությամբ, Տոկիոյի հեղինակավոր համերգասրահներից մեկում՝ «Ասահի Հոլլ»-ում, տեղի է ունեցել հայ անվանի ջութակահար Հրաչյա Ավանեսյանի մենահամերգը` նվիրված ՀՀ անկախության 20-ամյակին. հայտնում են ԱԳՆ մամլո ծառայությունից:

Միջոցառմանը ներկա են գտնվել Ճապոնիայի կառավարության բարձրաստիճան պաշտոնյաներ, խորհրդարանի պատգամավորներ, երկրում հավատարմագրված դիվանագիտական առաքելությունների ղեկավարներ, խոշոր գործարարներ, մշակութային եւ գիտական կառույցների ներկայացուցիչներ:

Հրաչյա Ավանեսյանի կատարմամբ հնչել են հայ եւ եվրոպացի կոմպոզիտորների ստեղծագործություններ, հայկական ժողովրդական մեղեդիների մշակումներ, որոնք մեծ խանդավառությամբ եւ բերկրանքով են ընդունվել ճապոնացի հանդիսատեսի կողմից:

Հայ արվեստի ուժը լավագույնս արտահայտվել է ոչ միայն տաղանդաշատ ջութակահարի երաժշտությամբ, այլեւ այն հանգամանքով, որ Ճապոնիայում համերգ ունենալու առիթով միջազգային հիմնադրամներից մեկը նրան է վստահել իտալացի մեծ վարպետ Անտոնիո Ստրադիվարիուսի` 1717թ. պատրաստած գործիքը: