Սահակաշվիլին` ժողովրդավարության պաշտպան

Վրաստանի նախագահ Միխեիլ Սահակաշվիլին Թբիլիսիում անցկացված ցույցերի կազմակերպիչներին մեղադրել է սաբոտաժի, Անկախության օրվա առթիվ անցկացվելիք զորահանդեսը ձախողելու, զանգվածային անկարգություններ հրահրելու մեջ:

«Ակցիաների կազմակերպիչները ձեռք բարձրացրին Վրաստանի ժողովրդավարության վրա, սակայն մենք ոչ ոքի թույլ չենք տա քաոս ստեղծել ու ապակայունացնել երկրի վիճակը: Մենք չենք նահանջի եւ կպաշտպանենք ժողովրդավարությունը մեր երկրում»,- ըստ apsny.ge-ի` զորահանդեսի ժամանակ հայտարարել է Սահակաշվիլին:

Ըստ նրա` բոլորն էլ խոսքի եւ այլ ազատությունների իրավունք ունեն, սակայն ընդդիմությունը ոչ թե խոսքի ազատություն, այլ բռնություն ու զոհեր էր ուզում: «Երբ նրանք երեկոյան չկարողացան հասնել իրենց ուզածին, փախան այստեղից ավտոմեքենաներով` վրաերթի ենթարկելով երկու մարդու»,- նշել Վրաստանի նախագահը:

Նա նաեւ հայտարարել է, որ ընդդիմության գործողությունների սցենարը դրսում է գրվել: